NADAL

Este curso celebramos no centro o Nadal con varias actividades. Parte do alumnado de 2º e 3º ESO ofreceu un concerto de Nadal organizado polo Departamento de Música; o alumnado de Oratoria escribiu un conto de Nadal que logo leu ao alumnado de Educación Infantil dos CEIP Mar de Fóra e Areouta; o Departamento de EPVA organizou un concurso de decoración de árbores de Nadal; gozamos de dous obradoiros, un de rap coa saúde mental como tema e outro de estampación de camisetas; e, finalmente, como xa vén sendo habitual, dende a biblioteca publicamos a nosa particular postal de Nadal coas novidades que foron chegando a ela no primeiro trimestre e ao pé do mural coa árbore de Nadal feita con portadas de libros de recente incorporación, puidestes botar unha ollada as novidades expostas.

Xa sabedes que estas vacacións son un bo momento para ler!!

BO NADAL!!!  

 

 

 

 

Se facedes clic no círculo amarelo das portadas, teredes máis información sobre os libros.

QUE NON TE LÍEN, TI ELIXES

Hoxe tivo lugar na biblioteca unha charla, organizada polo Departamento de Orientación, dirixida ao alumnado de 3º e 4º ESO, enmarcada no programa educativo "Que non te líen, ti elixes", co que se pretende fomentar o rexeitamento de estereotipos de xénero e prexuízos na elección de itinerarios formativos e profesións con pouca representación feminina. Visitáronos a Secretaria Xeral de FEARMAGA e unha profesional do sector da madeira.

PUÑOS DE HARINA

O alumnado de 3º e 4º ESO asistiu hoxe á representación teatral "Puños de harina" no Auditorio da Casa da Cultura de Vimianzo. 

A obra, escrita e interpretada por Jesús Torres, de El Aedo Teatro, preséntanos dúas historias en forma de monólogo: a historia real de Rukeli, boxeador alemán e xitano que viviu na época da Alemania nazi, e a historia de Saúl, un mozo xitano na España rural dos anos oitenta na procura da súa identidade.

É unha obra que reflexiona sobre o racismo, a homofobia, a violencia e a masculinidade, merecedora de numerosos recoñecementos como o Premio Teatro 2019 Autor Exprés pola Fundación SGAE, Finalista a Premios Max 2021, Premio Nazario 2020 polo Festival Europeo do Sur Cultura con Orgullo.

Grazas ao Concello de Vimianzo pola súa invitación!

 

 

OS NENOS DA VARÍOLA

O pasado mércores 30 de outubro o alumnado do centro realizou unha ruta guiada pola Coruña que o levou tras os pasos da Real Expedición Filantrópica da Vacina, fito científico relatado nos libros Os nenos da varíola, de María Solar, e Novo Mundo. Isabel Zendal na Expedición da Vacina, de El primo Ramón. Durante o roteiro coñecemos máis a fondo esta aventura e detalles da vida dalgúns dos personaxes implicados nela, o alacantino Doutor Francisco Javier Balmis, a coruñesa Isabel Zendal Gómez e os vintedous nenos que cambiaron o mundo, ao manter viva a vacina nunha viaxe transoceánica.

 

SAMAÍN

O Samaín xa está aquí!! 

Dende a biblioteca convocamos concursos de minivídeos, cómic e relatos, co terror como tema para todos eles; animámonos a pasar medo escoitando as historias creadas polo alumnado de 1ºESO con Marta Seoane na materia LCL, e puidemos botar unha ollada ás lecturas de terror expostas ao carón do mural da entrada do centro.

Feliz Samaín!!

 

MANUEL RIVAS, PREMIO NACIONAL DAS LETRAS 2024

Manuel Rivas vén de ser galardoado co Premio Nacional das Letras Españolas, correspondente ao ano 2024. O xurado destacou do autor galego "a súa calidade narrativa que une forza emocional e beleza formal" e a "solidez dunha traxectoria versátil e coherente construída coa sensibilidade e a defensa da memoria histórica, a responsabilidade social e a lingua galega".

Parabéns!

 

Fotografía: Elena Ternovaja

A súa obra na nosa biblioteca.

DÍA DAS BIBLIOTECAS

O día 24 de febreiro celébrase o Día das bibliotecas, este ano co lema "Por un futuro sostible" e un cartel deseñado polo ilustrador Nicolás Aznárez. 

Como o celebramos nós? Entregando diplomas ás alumnas do Equipo de Voluntarias da Biblioteca, levando a cabo unha actividade lúdica de formación de usuarios para o alumnado de 1º ESO e amosando, a través dunha presentación, algunhas das actividades realizadas nela e como a nosa biblioteca se foi convertendo ao longo dos anos nese pequeno espazo de encontro e diálogo que é hoxe en día. 

Feliz Día das Bibliotecas!!

 

Equipo de voluntarias e os seus diplomas

Alumnado de 1ºESO na procura do tesouro

O equipo gañador

Se fas clic na imaxe, accederás á presentación.

PREMIO PLANETA 2024

A escritora Paloma Sánchez-Garnica, xa finalista en 2021, vén de gañar o Premio Planeta 2024 coa obra Victoria, unha historia de amor ambientada na Guerra Fría na que, segundo a autora, amósase "a importancia do xornalismo nun dos dereitos fundamentais dunha sociedade civilizada: o dereito á información veraz e contrastada”.

 

A finalista desta edición é a novela Fuego en la garganta, de Beatriz Serrano.

 

Gañadora e finalista do Premio Planeta 2024.

ANTONIO SKÁRMETA

Onte falecía o escritor chileno Antonio Skármeta. 

 

Comezou a súa andaina polo mundo da literatura a través de contos como El entusiasmo (1965) ou Desnudo en el tejado (1969). 

 

Máis tarde, durante os anos no exilio despois do golpe de Estado en Chile en 1973, cambiou de rexistro e escribiu varias novelas, entre elas Soñé que la nieve ardía (1975), No pasó nada (1980), La insurrección (1982) e Ardiente paciencia (1985), una das súas obras máis recoñecidas, na que imaxinou unha sensible amizade entre o poeta chileno Pablo Neruda e o seu carteiro, levada ao cine en dúas ocasións.
 

En 2003 gañou o Premio Planeta de Novela con El baile de la Victoria, adaptada ao cine por Fernando Trueba.
 

Como dramaturgo escribiu El plebiscito, un monólogo teatral que tamén foi levado á gran pantalla na película No, de Pablo Larraín, nomeada ao Oscar en 2012.

Nas súas obras destaca a súa representación do pobo chileno, a súa fascinación pola poesía e a importancia da fraternidade entre a xente, independentemente da súa orixe ou os seus logros.

 

Fotografía: Rodrigo Fernández

 

DÍA DAS ESCRITORAS

O Día das Escritoras é unha conmemoración promovida pola Biblioteca Nacional de España xunto á Federación Española de Mulleres Directivas, Executivas, Profesionais e Empresarias (FEDEPE) e a Asociación Clásicas e Modernas. Comezou a celebrarse no ano 2016 o luns máis preto da festividade de Teresa de Jesús, o 15 de outubro, e intenta poñer en valor o labor e legado das escritoras ao longo da historia.

Esta IX edición conta co comisariado da periodista e escritora Ana Iris Simón baixo o lema "A periferia da periferia: mulleres que miraron ao mundo rural". 

Nós fixemos unha exposición con recensións e libros das escritoras galegas máis lidas por nós, que podedes atopar na entrada do centro.

 

DÍA MUNDIAL DA SAÚDE MENTAL

Para conmemorar este día no 2024, co lema "A saúde mental no traballo", a OMS decidiu suliñar a importante relación existente entre a saúde mental e o ámbito laboral, instando a promover lugares de traballo seguros e saudables libres de estigmatización, acoso ou discriminación.

Coa intención de sensibilizar e dar visibilidade a un tema tan importante como a saúde mental, dende a biblioteca propoñémosvos as lecturas incluídas neste díptico. 

 

MAFALDA ESTÁ DE ANIVERSARIO

Mafalda, esa nena audaz e reivindicativa creada por Quino, fai hoxe 60 anos. Este personaxe viu a luz por primeira vez o 29 de setembro de 1964 na revista arxentina Primera Plana. A partir de aí o seu éxito foi tal, que as tiras que protagoniza están traducidas a máis de 20 idiomas.

Podedes atopala na nosa biblioteca!

Fotografía: Nacho

Na nosa biblioteca.

PREMIO NACIONAL DE POESÍA 2024

A poeta galega Chus Pato é a gañadora do Premio Nacional de Poesía 2024 polo poemario Sonora. O xurado do premio, que entrega o Ministerio de Cultura, destacou este libro por ser “unha obra experimental, unha expansiva e concentrada conversa entre o poema e a morte, aquela que, tras a orfandade da nai, arrastra os lectores cara aos abismos da propia liñaxe”. 

O xurado define a autora como unha peza fundamental da poesía galega e subliña as “novas formas de deconstruír e reconstruír os marcos do pensamento poético tradicional”. 

Parabéns!!

Fotografía: Jesús Chacón

Na nosa biblioteca.

COMEZAMOS DE NOVO!

Xa está aquí un novo curso e, con el, o Equipo de biblioteca con moita ilusión e ganas, coma sempre. Esperámosvos e agardamos que veña cargado de boas lecturas!!

 

REMATAMOS O CURSO!

Xa estamos en xullo! Esperamos que gozásedes das lecturas e as actividades que vos propuxemos ao longo deste curso.

 

Como despedida, deixámosvos os últimos traballos do Club de lectura: a ruta literaria baseada en Beleza vermella, de Arantza Portabales e a entrevista que as rapazas do grupo de ex-alumnas lle fixeron a autora durante o encontro do 4 de xuño para o seu espazo O recuncho do estudante en Radio Neria.

 

Bo verán!! 

Fotografía: Facebook Radio Neria

Entrevista a Arantza Portabales

 

TEMPO DE DESPEDIDAS

Este curso despedimos cun agasallo (un libro, por suposto!) e un diploma a catro alumnas do noso Club de lectura que destacaron pola súa participación nas actividades que organizamos ao longo destes catro anos dende o Club e a biblioteca.

Moitísima sorte a todas!

O CLUB DE LECTURA EN SANTIAGO

O pasado venres alumnado e profesorado do noso Club de lectura viaxamos a Santiago. Alí realizamos unha ruta literaria baseada en Beleza vermella, de Arantza Portabales, visitamos o Colexio de Fonseca, a Biblioteca América, varias librerías e o recinto da SELIC na Praza da Quintana, onde gozamos dun encontro coa escritora Andrea Maceiras, coa que falamos do seu libro Europa Express, lido durante o primeiro trimestre, e da súa nova obra Burbullas de calma serena.

Deixámosvos un booktrailer sobre Europa Express protagonizado polas alumnas do grupo de 2º do Club de lectura e un resumo da excursión.

Esperamos que vos gusten!

 

 

 

 

TORNEO DE XADREZ

Dylan e Mauro disputaron onte na biblioteca a final do Torneo de Xadrez 960 Fin do Camiño 2024. Este torneo, organizado polo Departamento de Artes Plásticas, leva celebrándose durante os recreos dos luns, martes e mércores dende hai uns meses.

Parabéns a todos os participantes, especialmente ao gañador!

 

Final entre Dylan e Mauro

ENCONTRO CON ARANTZA PORTABALES

Onte tivemos un agradable encontro coa escritora Arantza Portabales, autora da triloxía protagonizada polos inspectores Abad e Barroso, lida polo grupo de exalumnas, alumnas de 4ºESO e profesorado do Club de lectura.

 

Falounos dos seus libros, do proceso da escrita, dos seus libros e autores e autoras favoritos... e as ex-alumnas fixéronlle unha entrevista para o seu espazo en Radio Neria, O recuncho do estudante.

 

Moitísimas grazas, Arantza, pola túa visita! Grazas á editorial Galaxia por facer posible este encontro!

 

XORNADA DE PORTAS ABERTAS

Hoxe o alumnado de nova incorporación no vindeiro curso e o seu profesorado gozou dunha Xornada de portas abertas, na que parte das alumnas do Equipo de Voluntarias da Biblioteca, tamén integrantes do Club de lectura, amosáronlles as nosas instalacións e explicáronlles o funcionamento da biblioteca e as actividades que nela desenvolvemos, rematando, a modo de resumo, coa presentación "A nosa biblioteca".

Esperamos que cheguedes a gozar dela tanto coma nós!!

 

Parte do Equipo de Voluntarias e Club de lectura explicando o funcionamento da biblioteca.

Se fas clic na imaxe, accedes á presentación.

 

OBRADOIRO DE CALIGRAFÍA ROMANA ANTIGA

O alumnado de Cultura Clásica de 4ºESO participou nun obradoiro de caligrafía romana antiga impartido por Gonzalo, profesor da materia durante este curso. Todo o proceso foi artesanal, dende o soporte, realizado con gasas tinguidas con café soluble, ata as puntas das plumas, feitas polo propio alumnado a partir de latas de refrescos.

Parabéns polo voso traballo!

 

 

XXIX PREMIO DE NOVELA FERNANDO LARA

O escritor pontevedrés Manel Loureiro vén de ser galardoado co XXIX Premio de Novela Fernando Lara coa obra Cuando la tormenta pase, un thriller ambientado na Illa de Ons, que estará esperándonos nas librerías a partir do 19 de xuño.
 

Parabéns!!

 

Fotografía: Instituto Cervantes de Tokio