NOVEMBRO, MES DA CIENCIA EN GALEGO

Todos os anos dende 2014 celébrase en novembro o mes da ciencia en galego nas bibliotecas, celebración na que participa unha científica ou un científico galego redactando un manifesto no que reivindica a importancia da ciencia. Persoas como Ángel Carracedo, Jorge Mira, a arquitecta Isabel Aguirre de Urcola, a matemática Peregrina Quintela Estévez... fixérono estes anos atrás e Amparo Alonso Betanzos, profesora, enxeñeira química e investigadora en intelixencia artificial, foi a encargada de escribir o manifesto este ano 2021.
Durante todo o mes estivemos recomendando lecturas científicas en galego no expositor e o taboleiro da entrada do centro, recompilando, ademais as nosas propostas nesta montaxe protagonizada por membros do Club de Ciencia. Esperamos que vos guste!

 

ALMUDENA GRANDES

O pasado sábado falecía Almudena Grandes, autora de obras tan coñecidas como Las edades de Lulú, El corazón helado, Atlas de la geografía humana, Te llamaré viernes, Los besos del pan ou a serie Episodios de una guerra interminable, da que queda un derradeiro libro no tinteiro. Algunhas das súas novelas foron levadas con éxito ao cine como Malena es nombre de tango ou Los aires difíciles.

Fotografía: FDV

25-N: FISTERRA EN NEGRO

Onte participamos, xunto cos outros centros educativos da vila, no acto convocado polo Concello de Fisterra con motivo do Día Internacional da Eliminación da Violencia contra a Muller. O alumnado de 1º e 2º ESO portou unhas candeas por cada unha das mulleres asasinadas este ano, o alumnado de 3º ESO elaborou unha pancarta, e representantes do club de lectura de cada curso leron fragmentos de Senlleiras, Xela volveuse vampira, Invisibles e A afogada e un breve manifesto. No acto participou tamén o poeta Alexandre Nerium.

 

 

Ver imaxes

 

Recomendación de libros e películas sobre o tema.

DARÍO XOHÁN CABANA

O escritor, tradutor e académico Darío Xohán Cabana faleceu onte á noite aos 69 anos. Nado en Cospeito, na parroquia de Roás, foi un autor que explorou varios xéneros literarios, escribindo máis de 40 volumes. Entre as súas obras destacan as de carácter narrativo Galván en Saor, Fortunato de Trasmundi, O cervo na torre, entre outras, ou poemarios como Patria do mar ou Canta de cerca a morte. Escribiu tamén obras de carácter xuvenil como As aventuras de Breogán Folgueira ou As viaxes do Príncipe Azul, e traduciu ao galego grandes clásicos da literatura italiana. No ano 2006 entrou na Real Academia Galega ocupando a cadeira vacante producida polo pasamento de Manuel María.

Fotografía: Santos-Díez (Ollo de Vidro-ACAB)

DÍA DAS LIBRERÍAS

Hoxe celébrase a undécima edición do Día das librerías, coa elección dunha data fixa: o 11 de novembro. Querendo recompensar o seu gran esforzo por seguir creando comunidades lectoras e manténdoas vivas, recuperamos o vídeo-homenaxe que realizamos o curso pasado.