DÍA MUNDIAL DO TEATRO

Dende 1962 os centros ITI (International Theatre Institute) e a comunidade teatral internacional celebran o 27 de marzo o Día Mundial do Teatro con diversos actos. Un dos máis representativos é a  elaboración e lectura dun manifesto, tradicionalmente escrito por unha personalidade de recoñecido prestixio no mundo do teatro. Este ano é o turno do dramaturgo noruegués Jon Fosse.

Asemade, a Asociación de Actores e Actrices de Galicia (AAAG) fai público o ‘Manifesto Galego do Día Mundial do Teatro’, que este ano redactou a narradora oral Vero Rilo.

Nós poñemos o noso gran de area elaborando un tríptico coas nosas suxestións teatrais e promovendo a asistencia a espectáculos teatrais entre o noso alumnado, como no mes de novembro coa intervención escénica de Os Náufragos Teatro na nosa biblioteca e na Casa Museo Picasso da Coruña e outra probable actividade no mes de maio (Letras Galegas).

 

AUTORES E AUTORAS DA COSTA DA MORTE

Presentámosvos dúas antoloxías poéticas, coordinadas por autores da Costa da Morte, que acaban de incorporarse á nosa biblioteca: Aquén do Mar e Antoloxía poética de Labarta Pose.

 

Esperamos que sexan do voso agrado!

 

DÍA MUNDIAL DA POESÍA

O día 21 de marzo celébrase o Día Mundial da Poesía, día adoptado pola UNESCO durante a súa 30ª Conferencia Xeral en París en 1999, co obxectivo de apoiar a diversidade lingüística a través da expresión poética.

En palabras de Audrey Azoulay, Directora Xeral da UNESCO: "Neste  Día  Mundial  da  Poesía,  a  UNESCO  celebra  o  poder  de  cuestionar  as  certezas  para  permanecer  abertos  aos  demais, para  acoller  o  mundo  en  toda a súa  diversidade –que son fundamentos esenciais para construír sociedades pacíficas."

Nós este ano publicamos un díptico cunha selección de poemarios de autores e autoras da Costa da Morte dispoñibles na nosa biblioteca e homenaxeamos cinco poetas de Fisterra, facendo unha exposición e poñendo voz aos seus poemas, sendo Carla a encargada de facelo nesta montaxe que esperamos que vos guste.

 

GHUAIDELAI REMATA O SEGUNDO TRIMESTRE

Rematamos outro frutífero trimestre en canto a lecturas! Nas imaxes podedes ver algúns dos títulos lidos... e as nosas artistas debuxando a súa versión das portadas!!

 

  

 

CONCURSO DO DÍA INTERNACIONAL DA MULLER

Xa temos gañadora do Kahoot baseado na presentación 8 Mulleres Galegas realizada pola Biblioteca: Adela, de 3ºA. Parabéns!!

 

Esta actividade formou parte da celebración do Día Internacional da Muller.

Parabéns!!

DÍA INTERNACIONAL DA MULLER

Este ano unímonos á celebración do Día Internacional da Muller con diferentes actividades. As integrantes do grupo de 2º ESO do Club de lectura leron un manifesto que incluía "Carta de una madre", de C. De Santos; inauguramos a exposición As mulleres da nosa vida, con fotografías proporcionadas polo alumnado; editamos un vídeo-homenaxe ás mulleres de Fisterra; e realizamos a presentación 8 Mulleres Galegas, sobre a que elaboramos un Kahoot no que invitamos a participar a todo o alumnado.

 

Alumnas do Club de lectura lendo o manifesto