BO NADAL!

Como xa vén sendo habitual cando se achega o Nadal, facemos publicidade das novidades que se foron incorporando á nosa biblioteca durante o primeiro trimestre. Este ano fixémolo de varios xeitos: cunha árbore feita coas portadas dos libros, xunto coa exposición dos novos exemplares, na entrada do centro; coa colaboración dos nosos elfos-membros do Club de lectura; e coa xa tradicional postal de Nadal bibliotecaria, na que, se facedes clic nas portadas que aparecen, teredes máis información sobre os libros.  

Xa sabedes que estas vacacións son un bo momento para ler!!

BO NADAL!!!  

 

 

PREMIOS

Xa que estamos en época de agasallos, aproveitamos o último día de clase antes das vacacións para facer entrega dos diplomas e premios ás dúas gañadoras do XIV Certame de Relatos de Terror e do III Certame de Cómic de Terror, convocados polo EDNL e a Biblioteca no mes de novembro: Amy, de 1º ESO, e Laura, de 2º ESO, respectivamente.

Parabéns as dúas polo voso traballo!! 

 

 

GHUAIDELAI REMATA O TRIMESTRE

Hoxe ao mediodía tivemos a última reunión do ano cos grupos de 2º e 4º ESO do noso Club de lectura. Despois de xantar todos xuntos, os membros dos dous grupos gravaron un breve programa, co equipo de radio do centro, baseado nas súas respectivas lecturas: O misterio do torque de Burela, de Antía Yáñez, e Aqueles corpos nosos, de Adrián Gómez. 

Por último, repartimos os exemplares das lecturas coas que inauguraremos o novo ano: O corazón de Xúpiter, de Ledicia Costas, para o grupo de 2ºESO; e Orgullo y prejuicio, de Jane Austen, para 4º ESO, coincidindo con que mañá será o 250 aniversario do nacemento da escritora.

 

 

E aquí deixámosvos a gravación das nosas breaking news, que poderedes escoitar facendo clic na imaxe.

 

 

 

TEATRO: "AS ALUMNAS"

O alumnado de 4º ESO tivo o privilexio de asistir esta mañá no Auditorio da Casa da Cultura de Cee á representación da obra "As alumnas", de Paula Carballeira, que mantivo, xunto coas actrices, un entretido coloquio co público asistente ao finalizar a actuación.
Agradecemos moito ao Concello de Cee o seu convite e a Paula Carballeira por falar un anaquiño con nós. Temos a sorte de que no mes de maio volveremos ter a oportunidade de conversar con ela cando nos visite! 

 

 

QUE NON TE LÍEN. TI ELIXES!

Onte o alumnado de 3º e 4º ESO asistiu a unha charla formativa, organizada polo Departamento de Orientación, enmarcada no programa Que non te líen. Ti elixes!, que ten como obxectivo o fomento dunha orientación profesional libre de estereotipos de xénero. Nesta edición a relatora foi Mª Xosé Saborido, da empresa Dinahosting, pertencente ao Clúster TIC Galicia. 

 

25N

Hoxe participamos no acto organizado polo Concello de Fisterra con motivo do Día Internacional da Eliminación da Violencia contra a Muller. Nós contribuímos coa lectura dun manifesto e o recitado de poemas de María Reimóndez, Lupe Vázquez e Marta Dacosta por parte de membros do noso Club de lectura, portando carteis e amosando nunha pancarta os slogans elaborados polo alumnado de 2º ESO e os códigos QR correspondentes aos pódcasts que conforman Os sons da violencia, gravados polo alumnado de 4º ESO e que podedes escoitar nas ligazóns que hai ao final desta publicación.

Xa no centro, no primeiro andar decoramos o noso recuncho 25N con libros relacionados coa violencia de xénero e puxemos á vosa disposición un número especial de A Voz do FdC.

Moitas grazas a todos e todas os participantes pola vosa implicación!

 

 

Debuxo realizado por Laura e Celia 

Entrega de agasallos ao alumnado que participou activamente no acto.

 

 

  

Os sons da violencia:

#1 A denuncia: Adriana e Aroa
#2 A ruptura: Xabier e Marta
#3 Apoiándonos: Uxía e Aracely
#4 Comentarios inapropiados: Alberto e Mateo

SUMANDO GRUPOS AO CLUB DE LECTURA

O Club de lectura continúa sumando... Esta semana dous grupos máis iniciaron a súa actividade: un grupo de tres alumnas de 1ºESO, moi fans de Eloy Moreno, que logo da lectura de Invisible están somerxidas na lectura de Redes; e un grupo de 2ºESO de lectura de cómic que comezou o thriller La chica Invisible, ilustrado por Alba Cardona.
O resto dos grupos comezarán a vindeira semana!

 

DÍA INTERNACIONAL CONTRA A VIOLENCIA E O ACOSO ESCOLAR

Os Estados Membros da UNESCO declararon o primeiro xoves de novembro como o Día Internacional contra a Violencia e o Acoso Escolar, incluído o ciberacoso, recoñecendo que a violencia nas escolas, en todas as súas formas, constitúe unha violación dos dereitos á educación, saúde e o benestar dos nenos, nenas e adolescentes. Este ano o lema é Mente dixital: Aprender a coidarse na era tecnolóxica. 

Dende a biblioteca elaboramos un díptico propoñéndovos varios libros. Esperamos que vos guste e que gocedes da súa lectura!!

  

VISITA AO MAHI

Onte, mentres o grupo de 2ºESO que este curso representará ao noso centro na Liga Maker Drone asistía á presentación da V edición, o resto do alumnado do Club de Ciencia, que comparte moitos dos seus membros co Club de lectura, gozou dunha visita guiada ao MAHI (Museo de Automoción e Historia). Nel non só aprenderon sobre automoción e tecnoloxía (fonógrafos, teléfonos...), senón tamén sobre certos fitos históricos do século XX a través dos paneis con reproducións de páxinas de xornais que cubrían as paredes dalgunhas salas: a morte de Emilia Pardo Bazán, un discurso de Hitler, a morte de Valle-Inclán... 

Nós, sempre poñendo énfase na lectura e o uso crítico dos medios de comunicación! 

 

 

SAMAÍN

O Samaín xa está aquí!! Dende a biblioteca e o ENDL convocamos concursos de cómic e relatos, co terror como tema; animámonos a pasar medo escoitando as historias creadas polo alumnado de 1ºESO; gozamos da exposición sobre seres mitolóxicos galegos elaborada polas alumnas do Club de lectura Adriana, Aroa e Marta, e puidemos botar unha ollada ás lecturas de terror expostas ao carón do mural da entrada do centro.
Feliz e arrepiante Samaín!!

 

 

DÍA DAS BIBLIOTECAS

O día 24 de febreiro celébrase dende 1997 o Día das bibliotecas, este ano cun cartel deseñado pola ilustradora Laura Wächter e co lema "Contra a desinformación: bibliotecas", pretendendo destacar o papel fundamental que desempeñan todas as tipoloxías de bibliotecas na loita contra a desinformación. 

Como o celebramos nós? Entregando diplomas ás alumnas do Equipo de Voluntarias da Biblioteca, levando a cabo unha actividade lúdica de formación de usuarios para o alumnado de 1º ESO e amosando, a través dunha presentación proxectada no vestíbulo do centro durante o recreo, algunhas das actividades realizadas nela e como a nosa biblioteca se foi convertendo ao longo dos anos nese pequeno espazo de encontro e diálogo que é hoxe en día. 

Ademais, nas horas de titoría dos diferentes grupos proxectarase nas vindeiras semanas a charla desenvolvida no IES Urbano Lugrís de Malpica para reflexionar sobre as novas formas de desinformación.

Feliz Día das Bibliotecas!!

 

Equipo de Voluntarias cos seus diplomas.

Na procura do tesouro.

Na procura do tesouro.

Na procura do tesouro.

Na procura do tesouro.

Na procura do tesouro.

Na procura do tesouro.

O equipo gañador.

Se fas clic na imaxe, accedes á presentación.