Como manda a tradición, elaboramos unha postal con algunhas das novidades que foron chegando á nosa biblioteca neste primeiro trimestre. Se facedes clic nas portadas dos libros que aparecen no interior da postal, teredes máis información sobre eles.
Xa coñecemos os nomes do gañador e gañadoras dos Premios Xerais 2020: Andrea Maceiras foi galardoada co Premio Merlín de Literatura Infantil 2020 por A folla azul; santoamaro, de Antonio Manuel Fraga, foi a obra gañadora do Premio Jules Verne de Literatura Xuvenil 2020, e Coidadora, de María Marco Covelo obtivo o Premio Xerais de Novela 2020.
Parabéns aos tres!!
 |
| Andrea Maceiras na nosa biblioteca en maio do 2019. |
O 3 de decembro foi declarado o Día Internacional das Persoas con Discapacidade en 1992 pola Asemblea Xeral das Nacións Unidas co obxectivo de promover os dereitos e benestar de todas as persoas con discapacidade en todos os ámbitos da sociedade, así como concienciar sobre a súa situación en todos os aspectos da vida política, social, económica e cultural.
Neste día queremos recomendar tres libros e unha película cuns protagonistas que nos namorarán e nos farán reflexionar: Campeones, dirixida por Javier Fesser; Mi hermano persigue dinosaurios, de Giacomo Mazzariol; Palabras de caramelo, de Gonzalo Moure, e Amigos en tempo real, de Ramiro J. Álvarez.
Podedes atopalos na nosa biblioteca.
Animádevos!!
Este ano as medidas sanitarias fixeron que o acto organizado polo Concello para os todos os centros educativos da vila fose substituído por obradoiros de igualdade para as diferentes clases.
Deixámosvos o vídeo-resumo do acto do curso pasado coa lectura do manifesto por parte de varios membros do noso Club de lectura.
Os diferentes grupos do Club de lectura xa comezaron a súa andaina! O grupo de 1º está a gozar de Candorcas e unicornios, de María Canosa; o de 2º está lendo Mentira, de Care Santos; o de 4º Os nenos da varíola, de María Solar e o de lectura manga comezou o curso con Dr. Stone, de Riichiro Inagaki.
Hoxe celébrase a décima edición do Día das Librarías, nun momento no que, máis que nunca, debemos recompensar o seu gran esforzo por seguir creando comunidades lectoras e manténdoas vivas.
Nós queremos homenaxear aquelas coas que dalgún xeito creamos un vínculo ao longo destes anos e que supuxeron (e seguen supoñendo) para nós unha fonte inesgotable de marabillosas lecturas.
Velaquí o noso agasallo...
Este ano celebramos o Día das Bibliotecas coa formación de usuarios que sempre levamos a cabo co alumnado de 1ºESO, pero esta vez dun xeito especial: foron os alumnos e alumnas de 1º os que puxeron voz a unha montaxe realizada para dar a coñecer as novas normas que, en principio, rexerán a nosa biblioteca durante este curso.
Velaquí está o resultado!
Achégase o Samaín... preparados e preparadas para pasar medo? Animámosvos a participar no concurso de microrrelatos de terror. As bases están en cada unha das vosas aulas e as caixas de correo esperan as vosas arrepiantes achegas no mostrador de secretaría.
E se queredes "ler de medo" esta fin de semana, deixámosvos este tríptico con algunhas recomendacións. Achegádevos á biblioteca!!
O Día das Bibliotecas celébrase cada 24 de outubro dende 1997 por iniciativa da Asociación de Amigos do Libro Infantil e Xuvenil co obxectivo de concienciar da importancia da lectura e como homenaxe ao labor dos bibliotecarios e bibliotecarias.
A edición deste ano, baixo o lema "Bibliotecas, sempre ao teu lado" céntrase en destacar o importante papel que xogan as bibliotecas ofrecendo acceso á cultura, ao coñecemento e ao entretemento en calquera lugar e circunstancia, resaltando, tamén, o gran labor que desempeñan as bibliotecas situadas no mundo rural.
Por iso nós neste día queremos render unha homenaxe á Casa do Arco, a Biblioteca Municipal de Fisterra, onde fomos tan ben recibidos por Teresa e Darío na visita realizada co alumnado de 1ºESO o ano pasado. Grazas!
O Día das Escritoras é unha
conmemoración promovida pola Biblioteca Nacional de España xunto á
Federación Española de Mulleres Directivas, Executivas, Profesionais e
Empresarias (FEDEPE) e a Asociación Clásicas e Modernas. Comezou a
celebrarse no ano 2016 o luns máis preto da festividade de Teresa de
Jesús, o 15 de outubro, e intenta poñer en valor o labor e legado das
escritoras ao longo da historia.
Deixámosvos a lectura dalgúns fragmentos de obras escritas por mulleres cunha temática común: "o esforzo cotián das mulleres", o elixido este ano.
Hoxe celébrase o centenario do nacemento de Miguel Delibes. Autor de obras tan coñecidas como, entre outras, La sombra del ciprés es alargada, coa que obtén o Premio Nadal en 1948, El camino (1950), Las ratas (1962), Cinco horas con Mario (1966), adaptada ao teatro, El príncipe destronado (1973), Los santos inocentes (1981), levada ao cine por Mario Camus ou El hereje (1998).
Considerado un dos principais referentes da literatura española, obtivo ao longo da súa carreira os máis destacados galardóns do ámbito literario: o Premio Nadal (1948), o Premio da Crítica (1953), o Príncipe de Asturias (1982), o Premio Nacional de las Letras Españolas (1991) e o Premio Miguel de Cervantes (1993), entre outros.
Foi ademais xornalista, chegando a ser director de El Norte de Castilla, xornal que no especial publicado con motivo do centenario inclúe catro podcast nos que podemos escoitar a voz de Delibes.
Nós quixemos homenaxealo lendo fragmentos dalgunhas das súas obras. Se facedes clic na icona que hai debaixo de cada portada poderedes escoitar a Brais, Óscar, Alanis, Aroa e Elisa; e se facedes clic no centro das portadas, teredes máis información sobre os libros.
A poeta galega Olga Novo vén de gañar o Premio Nacional de Poesía 2020 pola súa obra Feliz Idade. Da súa obra o xurado destacou que se trata dun "relato vitalista que celebra o amor e a existencia máis aló do tempo".
Outros poemarios seus son A teta sobre o sol (1996), Nós nus (1997, premio Losada Diéguez de Creación), A cousa vermella (2004) e Cráter (2011), que foi premio da Crítica española.
 |
| Fotografía de Faia Costeira |
Onte dábase a coñecer a galardoada co Premio Nobel de Literatura 2020: a poeta norteamericana Louise Glück. En palabras do xurado, este galardón débese á "súa inconfundible voz poética que con austera beleza fai universal a existencia individual".
A súa primeira obra foi o volume de poesía Firstborn en 1968 e dende entón leva publicadas doce coleccións de poesía e algúns volumes de ensaio que tratan temas como a infancia ou a vida familiar, que entronca con mitos da antigüidade ou coa tradición literaria de occidente.
 |
| Fotografía de Jakson2204 |
Onte morría Quino, creador de Mafalda, esa nena crítica, lúcida, pacifista e contestataria, protagonista dunhas tiras cómicas que, aínda que só se publicaron entre 1964 e 1973, seguiron traducíndose e reeditándose, recorrendo todo o mundo ata hoxe, entusiasmando a varias xeracións.
Cremos que é un bo momento para reler ou coñecer por primeira vez as aventuras desta rapaza e as personaxes que a rodean, achegándovos á nosa biblioteca... alí vos esperan!
E aquí estamos un curso máis, esta vez con novas normas na nosa biblioteca, debidas á situación sanitaria ocasionada pola COVID-19. Pero isto non significa que non continuemos a dar o servizo de préstamo, ou que non poidamos usar o espazo da biblioteca e os seus ordenadores... Seguiremos con ilusión, gozando da lectura, coma sempre, pero intentando minimizar os riscos de contaxio, por iso, coa fin de manter na medida do posible a continuidade do grupo de pertenza contemplada en todas as actividades do centro, asignarase un día da semana a cada clase para que poidades vir.
Aquí podedes atopar as normas que, en principio, rexerán o uso da biblioteca durante este curso.
Onte celebrouse o centenario do nacemento do escritor uruguaio Mario Benedetti, autor de poemas como “Hagamos un trato”, "Los formales y el frío" ou "Soneto de la que fue".
Para renderlle homenaxe, no Instituto Cervantes congregáronse cantantes e poetas como Serrat, Sabina, Rozalén, Benjamín Prado, Elvira Sastre, Vanesa Martín ou Ismael Serrano e recitaron algúns dos seus poemas.
 |
| Fotografía de Elisa Cabot. |
E chegamos ao remate deste curso tan atípico no que, a pesar das circunstancias, non deixamos de ler e ler, como amosa esta "memoria audiovisual" das lecturas levadas a cabo polo noso Club de lectura Ghuaidelai.
 |
| Club de lectura Ghuaidelai e Marina, de Carlos Ruiz Zafón - Decembro 2014. |
 |
| Antía Yáñez na nosa biblioteca en maio de 2018. |
 |
| Andrea Maceiras na nosa biblioteca o curso pasado. |
 |
| Recordade: cando lemos un libro, podemos viaxar sen saír da casa!! |
 | |||
| Cando lemos un libro, podemos viaxar sen saír de casa!! |
 |
| Cartel realizado por María del Álamo Ortega |
 | |
| Cartel realizado pola ilustradora Xulia Pisón | . |
