SUMANDO GRUPOS AO CLUB DE LECTURA

O Club de lectura continúa sumando... Esta semana dous grupos máis iniciaron a súa actividade: un grupo de tres alumnas de 1ºESO, moi fans de Eloy Moreno, que logo da lectura de Invisible están somerxidas na lectura de Redes; e un grupo de 2ºESO de lectura de cómic que comezou o thriller La chica Invisible, ilustrado por Alba Cardona.
O resto dos grupos comezarán a vindeira semana!

 

DÍA INTERNACIONAL CONTRA A VIOLENCIA E O ACOSO ESCOLAR

Os Estados Membros da UNESCO declararon o primeiro xoves de novembro como o Día Internacional contra a Violencia e o Acoso Escolar, incluído o ciberacoso, recoñecendo que a violencia nas escolas, en todas as súas formas, constitúe unha violación dos dereitos á educación, saúde e o benestar dos nenos, nenas e adolescentes. Este ano o lema é Mente dixital: Aprender a coidarse na era tecnolóxica. 

Dende a biblioteca elaboramos un díptico propoñéndovos varios libros. Esperamos que vos guste e que gocedes da súa lectura!!

  

VISITA AO MAHI

Onte, mentres o grupo de 2ºESO que este curso representará ao noso centro na Liga Maker Drone asistía á presentación da V edición, o resto do alumnado do Club de Ciencia, que comparte moitos dos seus membros co Club de lectura, gozou dunha visita guiada ao MAHI (Museo de Automoción e Historia). Nel non só aprenderon sobre automoción e tecnoloxía (fonógrafos, teléfonos...), senón tamén sobre certos fitos históricos do século XX a través dos paneis con reproducións de páxinas de xornais que cubrían as paredes dalgunhas salas: a morte de Emilia Pardo Bazán, un discurso de Hitler, a morte de Valle-Inclán... 

Nós, sempre poñendo énfase na lectura e o uso crítico dos medios de comunicación! 

 

 

DÍA DAS BIBLIOTECAS

O día 24 de febreiro celébrase dende 1997 o Día das bibliotecas, este ano cun cartel deseñado pola ilustradora Laura Wächter e co lema "Contra a desinformación: bibliotecas", pretendendo destacar o papel fundamental que desempeñan todas as tipoloxías de bibliotecas na loita contra a desinformación. 

Como o celebramos nós? Entregando diplomas ás alumnas do Equipo de Voluntarias da Biblioteca, levando a cabo unha actividade lúdica de formación de usuarios para o alumnado de 1º ESO e amosando, a través dunha presentación proxectada no vestíbulo do centro durante o recreo, algunhas das actividades realizadas nela e como a nosa biblioteca se foi convertendo ao longo dos anos nese pequeno espazo de encontro e diálogo que é hoxe en día. 

Ademais, nas horas de titoría dos diferentes grupos proxectarase nas vindeiras semanas a charla desenvolvida no IES Urbano Lugrís de Malpica para reflexionar sobre as novas formas de desinformación.

Feliz Día das Bibliotecas!!

 

Equipo de Voluntarias cos seus diplomas.

Na procura do tesouro.

Na procura do tesouro.

Na procura do tesouro.

Na procura do tesouro.

Na procura do tesouro.

Na procura do tesouro.

O equipo gañador.

Se fas clic na imaxe, accedes á presentación.

PREMIO RAÍÑA LUPA 2025

A escritora burelá Antía Yáñez vén de gañar o Premio Raíña Lupa 2025 da Deputación da Coruña na modalidade infantil coa obra Bragakadabra, un libro que mestura humor, imaxinación e un pouco de maxia. 
O xurado valorou "a reflexión que propón o libro arredor da capacidade de superación e do empoderamento persoal" cunha "historia chea de sensibilidade e creatividade".

Parabéns, Antía!

 

Antía Yáñez co alumnado do grupo de 1ºESO do Club de lectura. Maio 2025.

 

DÍA DAS ESCRITORAS

O Día das Escritoras é unha conmemoración promovida pola Biblioteca Nacional de España xunto á Federación Española de Mulleres Directivas, Executivas, Profesionais e Empresarias (FEDEPE) e a Asociación Clásicas e Modernas. Comezou a celebrarse no ano 2016 o luns máis preto da festividade de Teresa de Jesús, o 15 de outubro, e intenta poñer en valor o labor e legado das escritoras ao longo da historia.
Esta X Edición conta co comisariado da escritora, crítica literaria e profesora Anna Caballé baixo o lema "1975: Escribide, compañeiras!". 
Para celebralo nós fixemos dúas exposicións: unha con reseñas das escritoras galegas máis lidas por nós, que podedes atopar na entrada do centro, e outra no primeiro andar sobre escritoras galegas que, seguindo o lema deste ano, escribían en 1975.

 

EXCURSIÓN A SANTIAGO

Onte o alumnado do centro desprazouse ata Santiago para levar a cabo diferentes actividades, mesturando letras e ciencias. Primeiro, visitamos o Museo de Historia Natural, onde nos falaron de biodiversidade, adaptación ao medio e, sobre todo, de diferentes tipos de minerais. Despois, mentres o alumnado de 1º e 4º ESO se dirixiu á Cidade da Cultura para gozar respectivamente das exposicións Orixes e Castelao. Mirar por Galicia, o alumnado de 2º e 3º ESO realizou unha visita guiada ao Museo do Pobo Galego. Despois de xantar foi a quenda do casco histórico da cidade, visitando a Praza do Obradoiro e o recinto da SELIC na Praza da Quintana. 

 

 

O CLUB DE LECTURA COMEZA A SÚA ANDAINA

O noso Club de lectura comezou hoxe a súa andaina! Despois de xantar xuntos, o alumnado dos grupos de 2º e 4º ESO inaugurou a tempada de reunións sobre a lectura de O misterio do torque de Burela, de Antía Yáñez (2º ESO) e Aqueles corpos nosos, de Adrián Gómez Ramos (4º ESO). Tanto un grupo como outro elixiu lecturas que corresponden a unha segunda entrega de historias lidas o curso anterior, escritas polos mesmos autores, e que lles encantaron: O misterio de Portomarín e Cando sangren os lobos.

Os outros grupos comezarán en breve!

 

 

 

PREMIOS XERAIS 2025

Xa podemos disfrutar das obras gañadoras dos Premios Xerais 2025, xa que están á venda en librerías dende onte. 

Estas obras son Mulleres que viven xuntas, de Abril Camino, gañadora do Premio Xerais de Novela; O corvo sobre a neve, de Andrea Maceiras, galardoada co Premio Jules Verne de Literatura Xuvenil; e Erin e o lobo, de Érica Esmorís, co Premio Merlín de Literatura Infantil.

O acto de entrega dos premios celebrarase o 11 de outubro no Museo do Mar de Galicia, en Vigo.

 

Érica Esmorís, Andrea Maceiras e Abril Camino (fotografías Edicións Xerais).

MÚSICA NA RÚA (II)

Como anunciabamos na anterior entrada, o venres pola noite, Andrea, Brais e Iker —membros de Dosis Letal e alumnos do noso Club de lectura— dando vía libre á súa liberdade, tocaron as súas cancións favoritas no casco antigo de Corcubión no marco de Música na rúa, evento organizado polo concello.

Ánimo e a pola seguinte!

 

MÚSICA NA RÚA (I)

Animámosvos a asistir ao concerto que terá lugar en Corcubión mañá venres coa actuación, entre outros, de Dosis letal, grupo formado nada máis e nada menos que por tres alumnos do noso Club de lectura. 

 

OUTONO DE LECTURAS

Agora que o comentario dunha coñecida influencer acaba de abrir un interesante debate sobre a lectura, nós, como non podía ser doutro xeito, defendemos as vantaxes de ler nunha presentación con citas dalgúns escritores e escritoras.

Gocemos da lectura!

 

PROXECTO ATLANTIC SUNSET

Hoxe leváronse a cabo no centro dúas actividades enmarcadas no proxecto Atlantic Sunset, que conmemorou o chamado Interreg Cooperation Day como xeito de poñer en valor o último solpor da Europa continental.
Por unha banda, a etnógrafa Lucrezia López, profesora da USC, falounos da importancia da Costa da Morte, e particularmente Fisterra, no imaxinario do Camiño de Santiago e a súa relación co solpor. Por outra, gozamos dunha experiencia inmersiva con gafas RV para apreciar os diferentes solpores da costa Atlántica.

 

 

PREMIO NACIONAL DE POESÍA 2025

A galega Miriam Reyes vén de ser galardoada co Premio Nacional de Poesía correspondente ao ano 2025 pola súa obra Con. O xurado elixiu esta obra por “ser un poemario que participa da conversación pública no que respecta ás posibilidades dos vínculos. A voz da autora traza con forza e orixinalidade o territorio do mutuo [...] O compás da obra céntrase nas dimensións da relación co outro". 

 

XA ESTAMOS DE VOLTA!

Comezamos un novo curso con moita ilusión e ganas, coma sempre, e desta volta con algunhas novidades: estrenamos programa de xestión, o Koha; temos carnés de biblio e un Equipo de Apoio á Biblioteca máis numeroso que os cursos pasados. 

Esperámosvos e agardamos que o curso veña cargado de boas lecturas!!

 

BO VERÁN!

Chegou xullo e damos por rematado este curso no que gozamos de tantas boas lecturas e actividades culturais.

 

Deixámosvos os últimos traballos realizados por alumnado do club de lectura. Esperamos que vos gusten!

 

Feliz verán!

 

 

LENDO CON ORGULLO

Hoxe celébrase o Día Internacional do Orgullo LGTBIQ+, conmemorándose que o 28 de xuño de 1969 producíanse as revoltas de Stonewall en Nueva York, consideradas como o inicio da loita moderna contra a discriminación por razón de orientación sexual e identidade de xénero. 

 

E, coma sempre, nós recomendamos unha selección de lecturas. Esperamos que gocedes delas!

 

TEMPO DE DESPEDIDAS

Este curso despedimos a dúas alumnas do noso Club de lectura que destacaron pola súa participación nas actividades que organizamos ao longo destes catro anos dende o Club e a biblioteca.

Moitísima sorte ás dúas! 

 

DÍA MUNDIAL DOS OCÉANOS

O Día Mundial dos Océanos celébrase anualmente o 8 de xuño dende 2009, data establecida pola Asemblea Xeral das Nacións Unidas. O obxectivo desta celebración é crear conciencia sobre o seu papel esencial na vida do planeta e o tema deste ano é Marabillas oceánicas: soster o que nos sustenta.

 

Dende a biblioteca elaboramos un díptico con lecturas relacionadas co mar, que esperamos que vos guste.

  

XORNADA DE PORTAS ABERTAS

Hoxe tivo lugar no centro unha Xornada de portas abertas, na que o alumnado de nova incorporación no vindeiro curso e o seu profesorado puido ver a nosa biblioteca e aprender sobre o seu funcionamento grazas ás explicacións de tres alumnas do Equipo de Voluntarias, tamén integrantes do Club de lectura, que, a modo de resumo, remataron coa presentación "A nosa biblioteca".

 

Esperamos que cheguedes a gozar dela tanto coma nós!!

  

Un momento da presentación.

Se fas clic, accedes á presentación.

ENCONTRO CON ANTÍA YÁÑEZ

Hoxe, á fin, puidemos gozar da tan esperada visita de Antía Yáñez! Primeiro, o profesorado do Club de lectura reuniuse con ela para falar do seu libro O clan das barbies, unha distopía con temas como os abusos, a prostitución, a xestación subrogada... A continuación, foi o turno do alumnado do grupo de 1º ESO do Club de lectura, co que tivo un agradable encontro en torno, principalmente, ao seu libro Plan de rescate, aínda que tamén se comentaron detalles de O misterio de Portomarín e O misterio do torque de Burela.

Grazas, Antía, pola túa visita!

Co alumnado do grupo de 1º ESO do Club de lectura.

 

 

Asinando exemplares ao alumnado.

Co grupo de profesoras do Club de lectura.