Hoxe, no marco do Programa Navega con Rumbo, visitounos Felipe Martínez Hermo, membro do CPEIG, para dar unha charla na biblioteca ao noso alumnado de 1ºESO.
A amena presentación con argumentos e indicacións desenvolveuse entre as intervencións do noso alumnado, centrándose en dúas cuestións: a seguridade en rede ou os perigos agochados e como evitalos; e as boas maneiras ou o respecto que como usuarios da rede debemos aos outros cibernautas.
O escritor Paul Auster faleceu onte en Brooklyn. É considerado como un dos máis grandes autores norteamericanos contemporáneos, destacando por obras tan coñecidas como a Triloxía de Nova York (1985-86).
Auster estudou en Columbia e, tras licenciarse en literatura, instalouse en París, onde traballou como tradutor hasta a súa volta a Estados Unidos en 1974. Establecido en Brooklyn dende entón, Auster combinou a literatura coa escrita de guións cinematográficos.
Ao longo da súa carreira literaria, recibiu numerosos galardóns como o Premio Médicis, a Orde das Artes e as Letras de Francia ou o Príncipe de Asturias das Letras.
Outras das súas novelas máis famosas son Moon Palace (1989), Leviathan (1992), Mr Vertigo (1994), The Book of Illusions (2002), Brooklyn Follies (2006), Viaxes no scriptorium (2007), Un home na escuridade (2008), Invisible (2009) e Sunset Park (2010).
A escritora, ilustradora e cineasta Marjane Satrapi (Rasht, 1969), autora do cómic de culto Persépolis, levado ao cine, é a gañadora do Premio Princesa de Asturias de Comunicación e Humanidades 2024 por ser "unha voz esencial para a defensa dos dereitos humanos e a liberdade", segundo anunciou o xurado onte en Oviedo. Deixámosvos un enlace a un vídeo moi breve onde tedes unhas pinceladas sobre a súa obra.
O académico da RAE e escritor leonés Luis Mateo Díez recibiu onte o Premio Cervantes que lle foi outorgado o pasado mes de novembro por «ser un dos grandes narradores da lingua castelá, herdeiro do espírito cervantino, escritor fronte a toda adversidade, creador de mundos e territorios imaxinarios».
No seu discurso rememorou o inicio da súa vocación literaria; referiuse aos "filandones", as reunións que se realizaban tras a cea para contar historias ao calor do lume na provincia de León e que formaron parte da súa infancia; e defendeu o triunfo da fantasía sobre o realismo.
Chegou o Día do Libro!! E como o celebramos nós? Recomendamos lecturas, convocamos o I Concurso de Booktubers IES Fin do Camiño, alumnas do Club de lectura leron contos ao alumnado de Educación Infantil do CEIP Mar de Fóra... e recibimos como agasallo bombóns e marcapáxinas personalizados.
O alumnado de todos os cursos asistiu hoxe na biblioteca a un obradoiro sobre saúde mental organizado polo Departamento de Orientación. Nel, unha terapeuta ocupacional de APEM (Asociación Pro Enfermos Mentais) falounos de diferentes tipos de trastornos mentais e os sinais de alarma que debemos ter en conta para detectalos e poder, así, minimizalos con axuda profesional. Veu acompañada dun usuario da asociación, que nos contou a súa propia experiencia.
Que mellor xeito de celebrar o Día do Libro Infantil e Xuvenil que coa visita, ao día seguinte, dunha das nosas autoras favoritas?
O alumnado de 1º e 2º ESO asistiu na biblioteca a un encontro, facilitado pola editorial Galaxia, coa escritora Antía Yáñez Rodríguez, autora de libros lidos por nós no Club de lectura como O misterio de Portomarín, O misterio do torque de Burela e Be water.
Tras a presentación da escritora feita por Mencía, Antía Yáñez falounos dos seus libros, da historia de Portomarín, do proceso da escrita e contestou ás preguntas que os alumnos e alumnas lle fixeron.
A continuación proxectamos o booktrailer sobre O misterio do torque de Burela, protagonizado polas alumnas do grupo de 2º ESO do Club de lectura.
Despois deste encontro, tivo unha xuntanza co grupo de profesorado do Club de lectura, co que falou do seu libro Senlleiras.
Moitas grazas, Antía, pola túa visita!
Antía Yáñez coas alumnas do grupo de 2º do Club de lectura.
Dende 1967, o IBBY promove a celebración do Día Internacional do Libro Infantil o 2 de abril, data de nacemento do escritor danés Hans Christian Andersen, coa finalidade de promover o bo libro infantil e xuvenil e a lectura entre os máis novos.
Cada ano, unha sección nacional do IBBY ten a oportunidade de ser a patrocinadora internacional do Día do Libro Infantil e selecciona un escritor ou escritora representativos e un ilustrador ou ilustradora de renome do seu país para crear unha mensaxe e un cartel.
Este ano a sección elixida é Xapón, que difunde a mensaxe da escritora Eiko Kadono (baixo o lema “Navega polos mares coas alas da túa imaxinación”), ilustrada por Nana Furiya.
O día 21 de marzo celébrase o Día Mundial da Poesía, día adoptado pola UNESCO durante a súa 30ª Conferencia Xeral en París en 1999, co obxectivo de apoiar a diversidade lingüística a través da expresión poética.
En palabras de Audrey Azoulay, Directora Xeral da UNESCO: "Neste Día Mundial da Poesía, a UNESCO celebra o poder de cuestionar as certezas para permanecer abertos aos demais, para acoller o mundo en toda a súa diversidade –que son fundamentos esenciais para construír sociedades pacíficas."
Nós este ano publicamos un díptico cunha selección de poemarios de autores e autoras da Costa da Morte dispoñibles na nosa biblioteca e homenaxeamos cinco poetas de Fisterra, facendo unha exposición e poñendo voz aos seus poemas, sendo Carla a encargada de facelo nesta montaxe que esperamos que vos guste.
Este ano unímonos á celebración do Día Internacional da Muller
con diferentes actividades. As integrantes do grupo de 2º ESO do
Club de lectura leron un manifesto que incluía "Carta de una
madre", de C. De Santos; inauguramos a exposición As mulleres
da nosa vida, con fotografías proporcionadas polo alumnado; editamos
un vídeo-homenaxe ás mulleres de Fisterra; e realizamos a
presentación 8 Mulleres Galegas, sobre a que elaboramos un Kahoot no
que invitamos a participar a todo o alumnado.
Hoxe celebramos o Día de Rosalía no centro con varias actividades. Seguindo a proposta da AELG, elaboramos o cartel-mural "Rosalía: o amor da patria galega"; durante o recreo puidemos escoitar a través da megafonía un recital poético protagonizado por alumnado e profesorado do centro; e, por último, a nosa Rosalía particular, Mencía, repartiu poemas e chapas deseñadas e elaboradas polo Departamento de Artes Plásticas.
O Día Internacional da Muller e a Nena na Ciencia foi proclamado no 2015 pola Asemblea Xeral das Nacións Unidas coa fin de lograr o acceso e a participación plena e equitativa na ciencia para as mulleres e as nenas.
Dende a biblioteca querémosvos propoñer, por medio dunha exposición e un díptico, varios libros e películas que nos axudarán a coñecer os logros de diferentes mulleres científicas ao longo da historia. Se facedes clic nas portadas, teredes máis información sobre eles.
No marco da alfabetización mediática e informacional, onte visitounos David, da Axencia para a Modernización Tecnolóxica de Galicia (AMTEGA).
Na súa intervención, David abordou os conceptos básicos da pegada dixital, así como as súas implicacións para a privacidade e a seguridade, e ofreceu consellos para protexer a nosa privacidade na web.
Agora que comprendemos os riscos asociados á nosa pegada dixital e como protexernos, tomemos o control!
Aínda que o mundo está bastante revolto, nós seguimos apostando pola paz e, para celebrar este día, elaboramos un mural con haikus feitos polo alumnado en galego, castelán, francés e inglés. Como dicían os Beatles, "Give peace a chance!".