OBRADOIRO DE EDUCACIÓN AFECTIVO-SEXUAL

Hoxe o alumnado de 1º e 2º ESO participou nun obradoiro de educación afectivo-sexual impartido polo centro de sexoloxía Con mucho gusto!

 

Aproveitamos a ocasión para expoñer os fondos da biblioteca relacionados coa temática.

  

MARJIANE SATRAPI

Onte deixábanos a novelista gráfica e cineasta Marjiane Satrapi, autora de obras como Persépolis, Bordados ou Pollo con ciruelas, todas elas na nosa biblioteca.

 

Nacida en Irán en 1969, estableceuse en París, onde desenvolveu a súa carreira. No ano 2024 foille concedido o Premio Princesa de Asturias de Comunicación e Humanidades. 

 

 

XORNADA DE PORTAS ABERTAS

Hoxe tivo lugar no centro unha Xornada de portas abertas, na que o alumnado de nova incorporación no vindeiro curso e o seu profesorado puido ver a nosa biblioteca e aprender sobre o seu funcionamento grazas ás explicacións de parte do alumnado do Equipo de Voluntarias e Voluntarios, tamén integrantes do Club de lectura, que, a modo de resumo, remataron coa presentación "A nosa biblioteca".

 

Esperamos que cheguedes a gozar dela tanto coma nós!!

 

Se fas clic aquí, podes ver a presentación.

ENCONTRO CON PAULA CARBALLEIRA

Hoxe tivo lugar na biblioteca un esperado encontro do alumnado de 1º, 2º e 4º ESO e profesorado do Club de lectura con Paula Carballeira, coa que falamos dos seus libros O lobishome de Candeán, Carabela e As alumnas.

Grazas a David Cortizo, da editorial Galaxia, por facer posible este momento! 

 

 

 

 

LETRAS GALEGAS 2026

Para celebrar o Día das Letras Galegas elaboramos un mural sobre Begoña Caamaño, a autora homenaxeada este ano, expuxemos os libros da nosa biblioteca escritos por ela ou sobre ela e publicamos un díptico co que pretendemos dar a coñecer un pouco máis a súa figura.

 

 

CUANDO LOS SUEÑOS HABLAN

Hoxe tivo lugar na Biblioteca Francisco Mayán de Cee a presentación do libro Cuando los sueños hablan, un thriller do noso ex-alumno Asier Fraga Caballero.

 

Parabéns, Asier, pola boa acollida da túa primeira obra!

 

DÍA DO LIBRO

Chegou o Día do Libro, e como o celebramos nós? Un ano máis, recomendamos lecturas, convocamos o III Concurso de Booktubers IES Fin do Camiño e o concurso Guess the Book para alumnado e profesorado ... e recibimos como agasallo bombóns e marcapáxinas personalizados! 

 

 

DÍA DO LIBRO INFANTIL E XUVENIL

Coma outros anos, o IBBY conmemora o Día do Libro Infantil e Xuvenil o 2 de abril, data de nacemento de Hans Christian Andersen, como xeito de promocionar os bos libros infantís e xuvenís e a lectura entre os máis novos e novas.

Cada ano unha sección nacional do IBBY é a patrocinadora da conmemoración, seleccionando un escritor ou escritora representativos e un recoñecido ilustrador ou ilustradora do seu país para que elaboren a mensaxe e o cartel dirixidos a todos os nenos e nenas do mundo. Chipre é o encargado no 2026. O lema é "Planta historias e o mundo florecerá!", da autora Elena Perikleous e o deseño do cartel é da ilustradora Sandra Eleftheriou.

 

 

Neste día queremos render unha homenaxe a aquelas autoras que nos visitaron nos últimos anos e coas que compartimos estupendos momentos arredor da lectura dos seus libros.

 

 

DÍA MUNDIAL DO TEATRO

A celebración do Día Mundial do Teatro é unha iniciativa impulsada polo Instituto Internacional do Teatro (ITI). 

Un dos seus actos máis importantes é a elaboración e difusión da Mensaxe do Día Mundial do Teatro, na que figuras importantes a nivel internacional son invitadas polo ITI para compartir os seus pensamentos sobre o teatro e a cultura de paz. Este ano a persoa encargada é o actor Willem Dafoe. Podedes ler a súa mensaxe aquí.

 

E como o celebramos nós? Creamos o noso particular taboleiro-escenario onde expuxemos os datos que consideramos máis salientables dos autores e autoras teatrais máis lidos por nós. Por outra banda, tamén amosamos algúns dos fondos teatrais da nosa biblioteca e elaboramos un díptico coas nosas recomendacións.

 

 

 

DÍA MUNDIAL DA POESÍA

Dende a Biblioteca e o ENDL organizamos varias actividades para celebrar o Día da Poesía: un concurso de versos encadeados por clases; caligramas e poemas ao azar. 
Asemade, como xeito de dar a coñecer a literatura local, no mural da entrada do centro expuxemos poemas de cinco poetas de Fisterra, acompañados dunha breve explicación sobre a súa traxectoria artística.
Finalmente, elaboramos un díptico con obras de poetas da Costa da Morte.

 

CHARLA DE MONTSE FAJARDO

Para rematar as actividades levadas a cabo no centro relacionadas co Día da Muller, hoxe visitounos a escritora e xornalista Montse Fajardo, especialista en memoria histórica, que falou ao alumnado de 3º e 4º ESO do tratamento que o franquismo deu ás mulleres. Coñecemos a historia de mulleres encarceradas, recluídas en institucións mentais, a existencia de leis e sistemas educativos inxustos coas mulleres...

 

Esta charla está subvencionada polo premio Luisa Villalta da Deputación da Coruña. 

 

 

 

 

OBRADOIRO PARA AS FAMILIAS: MENORES CONECTADOS

Esta tarde visitounos no centro, de novo, Manuel Rivas, de AMTEGA, esta vez para desenvolver un obradoiro dirixido ás familias relacionado con educación dixital en ciberseguridade e privacidade.

A actividade tivo moi boa acollida e foi do agrado dos e das asistentes, segundo os seus comentarios.

 

 

DÍA DA MULLER

Para celebrar o Día da Muller o alumnado colaborou de diferentes xeitos dende varias materias: elaborando carteis con oito razóns para celebrar este día; redactando recensións en inglés sobre mulleres salientables no mundo anglosaxón, e aportando imaxes de mulleres da súa contorna máis próxima para continuar coa iniciativa comezada hai uns anos "As mulleres da nosa vida", unha exposición na entrada do centro que intenta poñer en valor a importancia do labor desempeñado polas mulleres.

Asemade, á entrada da biblioteca expuxemos parte dos fondos adicados ao feminismo e publicamos un díptico coas nosas propostas.

 

 

 

 

DÍA DE ROSALÍA (II)

E para rematar a celebración do Día de Rosalía, e seguindo as propostas da AELG, hoxe tivo lugar na biblioteca un concurso Pasapalabra con preguntas baseadas na figura e obra da escritora. 

 

Quen gañará? Un agasallo está esperando!

 

 

INICIACIÓN SEGURA Á PEGADA DIXITAL

Hoxe tivo lugar no centro unha actividade organizada polo coordinador TIC, enmarcada no eido AMI. Manuel Rivas, de AMTEGA, visitounos para abrirnos os ollos sobre a nosa pegada dixital, porque non se trata só de navegar en busca de información, en moitas ocasións é a nosa identidade, seguridade e privacidade o que está en xogo. 

Nunha charla moi amena, ofreceunos consellos que nos permitirán acadar as habilidades e actitudes necesarias para interactuar de forma segura no entorno dixital, evitando riscos como o ciberacoso.

 

DÍA DE ROSALÍA (I)

Aínda que a celebración do Día de Rosalía xa empezou para nós o venres pasado coa visita á Casa-Museo Rosalía de Castro, hoxe inauguramos na entrada do centro un mural-collage co lema Mais eles tamén perdidos, realizado cunha selección de extractos de xornais recompilados e traducidos ao galego polo alumnado dos diferentes grupos. 

 

Ademais, durante o recreo organizamos un recital poético na biblioteca e tres alumnas do Equipo de Voluntarios e Voluntarias da Biblioteca repartiron poemas de Rosalía e chapas elaboradas por elas e deseñadas polo Departamento de Artes Plásticas.

 

RUTA LITERARIA EN PADRÓN

Onte trasladámonos a Padrón para visitar a Fundación Camilo José Cela e a Casa Museo de Rosalía de Castro, como actividade enmarcada na celebración do Día de Rosalía.

No primeiro lugar descubrimos que Camilo José Cela estivo durante unha temporada vencellado a Fisterra, mentres escribía o seu libro Madera de boj, e por iso hai unha placa conmemorativa e un busto do escritor nun extremo do paseo da praia Langosteira, onde empeza a Corredoira de Don Camilo.
Na Casa de Rosalía, logo das explicacións da guía, participamos nun escape room, no que o equipo máis rápido en resolver os retos foi o formado por alumnas de 2º e 4º ESO... aínda que a chave que conseguiu abrir a porta foi a do Caneta-team! 

 

Na Fundación Camilo José Cela

Na Fundación Camilo José Cela

Na Fundación Camilo José Cela

Na Fundación Camilo José Cela

 

Na Casa Museo de Rosalía de Castro

Na Casa Museo de Rosalía de Castro

 

Na Casa Museo de Rosalía de Castro

Escape room

Escape room

Escape room

Escape room

Escape room

Na Casa Museo de Rosalía de Castro