25N: VIVIR, NON SOBREVIVIR

Hoxe o noso centro participou no acto organizado polo Concello de Fisterra para conmemorar o Día Internacional para a Eliminación da Violencia contra a Muller. Alumnado do Club de lectura de todos os cursos, acompañado por dous alumnos do CEIP Mar de Fóra, realizou unha lectura colectiva do libro As mulleres que cultivaban néboas, de Bea Gregores, e rendemos homenaxe ás cincuenta e dúas mulleres asasinadas durante este ano cun minuto de silencio, portando máscaras brancas.

Neste acto deuse a coñecer que o lema proposto polo noso centro foi o escollido entre os presentados polos centros educativos de Cee, Fisterra e Corcubión para esta campaña: "Vivir, non sobrevivir".

 

OS NÁUFRAGOS TEATRO

O alumnado de 1º e 2º ESO asistiu o mércores na biblioteca a unha actividade escénica levada a cabo polos membros de Os Náufragos Teatro, na que fixeron un percorrido pola estancia de Picasso na Coruña. Esta actividade foi unha introdución á visita teatralizada que realizaremos o vindeiro xoves 30.

 

 

QUE NON TE LÍEN, TI ELIXES

Esta semana tivo lugar na biblioteca un obradoiro dirixido ao alumnado de 3º e 4º ESO, enmarcado no programa educativo "Que non te líen, ti elixes", co que se pretende fomentar o rexeitamento de estereotipos de xénero e prexuízos con respecto ás profesións con pouca representación feminina.

MES DA CIENCIA EN GALEGO

Todos os anos dende 2014 celébrase en novembro o mes da ciencia en galego nas bibliotecas, celebración na que participa unha científica ou un científico galego redactando un manifesto no que reivindica a importancia da ciencia. 

 

Este ano 2023 a persoa encargada de facelo foi Elena Vázquez Cendón, doutora en Matemáticas e decana da Facultade de Matemáticas da USC. É membro do Consello da Cultura Galega e preside o Estalmat-Galicia.

Dende a biblioteca, recompilamos as nosas propostas nesta montaxe protagonizada por membros do Club de lectura. Esperamos que vos guste!

MÁIS NOVIDADES

E seguen chegando novidades á nosa biblioteca: ciencia, manga, álbum ilustrado, narrativa xuvenil... Achegádevos a coñecelas!!